தற்காலத்தில் தொல்லியலும், அகழ்வாராய்ச்சியும் மனிதகுல வரலாற்றை அறிவதற்குப் பெரிதும் துணை செய்கின்றன. பீம்பேட்கா – (Bhimbetka rock shelters) என்பது மத்திய பிரதேசத்தில் உள்ள பாறை குகைகள். ஆப்பிரிக்காவிலிருந்து கால்நடையாக கிளம்பிய ஆதிகால மனிதர்களில் ஒரு பிரிவினர், ஒரு லட்சம் ஆண்டுகளுக்கு முன், இங்கு வந்து தங்கி வாழ்ந்திருக்கின்றார்கள் என்று தொல்லியல் ஆய்வுகள் கூறுகின்றன. இந்தப் பாறைகளில் உள்ள ஓவியங்கள், அந்தக் கால மக்களின் வேட்டையாடுதல், நடனம் போன்றவற்றை அறிய உதவுகின்றன. இந்தப் பீம்பேட்காவைக் களமாக வைத்து, இந்நாவலை எழுதியுள்ளார் ஆசிரியர்.

உதயசங்கர் எழுதிய ‘ஆதனின் பொம்மை’ நாவலில் வரும் கேப்டன் பாலுவும், அவன் மாமா மகள் மதுமிதாவும், இந்த நாவலிலும் முக்கிய கதாபாத்திரங்கள். கீழடி நாகரிகம் பற்றித் தெரிந்து கொண்ட பிறகு, பாலுவுக்கு வரலாற்றில் தீவிர ஆர்வம் வந்து விடுகிறது. அதன் பிறகு பூமியில் உயிர்கள் தோன்றிய வரலாறு குறித்து அறிய, முற்படுகின்றான். ஆதனின் பொம்மையில் வந்த ஆதன் மூலமே, இந்நாவலிலும் பாலு மனிதகுல வரலாறு குறித்த சந்தேகங்களைத் தீர்த்துக் கொள்கிறான்.

பூமியின் வயது 454 கோடி ஆண்டுகள் என்றும், 354 கோடி ஆண்டுக்கு முன்னால், சையானோ என்ற ஒரு செல் பாக்டீரியா தான், உலகில் முதன் முதலில் தோன்றிய உயிரென்றும் பாலு தெரிந்து கொள்கின்றான். தொடர்ந்து ஆப்பிரிக்காவில் முதன் முதலில் தோன்றிய மனித இனம் குறித்தும், ஹோமோ சேப்பியன்ஸ் குறித்தும், ஆப்பிரிக்காவில் தோன்றிய மனித இனம் அங்கிருந்து இடம் பெயர்ந்து, வழியில் நியாண்டர்தால் போன்ற வெவ்வேறு மனித இனக்குழுக்களைச் சந்திப்பது குறித்தும் தெரிந்து கொள்கின்றான்.

இந்த மனித இனக்குழு இந்தியாவுக்குள் வந்து, பீம்பேட்காவில் உள்ள பாறை வாழ்விடங்களில் தங்கி வாழ்ந்தது வரையிலான மானுடப் பயணத்தை ஆசிரியர், இந்த இளையோர் நாவலில் விவரித்திருக்கிறார். ஹோமோ சேப்பியன்ஸ் குறித்தும், மனித இனம் தோன்றிய வரலாறு குறித்தும், கதை மூலம் இளையோர் தெரிந்து கொள்ள உதவும் நாவல் இது.      

வகை	இளையோர் நாவல்
ஆசிரியர்	உதயசங்கர்
வெளியீடு	வானம் பதிப்பகம்,சென்னை-89 +91 9176549991
விலை	ரூ 90/-