இந்தக் கதையைப் பெல்ஜியம் நாட்டில் செயல்படுகிற Camera-etc என்ற தொண்டு நிறுவனம், குழந்தைகளுக்குப் பயிற்சி வகுப்புகள் நடத்தி, அவர்களோடு இணைந்து உருவாக்கியுள்ளது. இந்தக் கதையை ‘கசின் பர்ட்’ என்ற பெயரில், 4 நிமிட அனிமேஷன் குறும்படமாக அந்நிறுவனம் தயாரித்தது. அந்தக் கதையைச் ‘சாந்தநாயகம் ஆணா? பெண்ணா?’ என்ற தலைப்பில், நர்மதா தேவி தமிழில் படக்கதையாக மொழிபெயர்த்து இருக்கிறார்.
ஒரு பன்றிக் குடும்பத்தில் ஆண் பன்றிக்குட்டிகள் மரத்தில் ஏறிப் பழம் பறித்தல், கோழி பிடிக்க வரும் காட்டு விலங்குகளைத் துரத்துதல், சந்தைக்குப் பொருட்களை எடுத்துச் செல்லுதல் போன்ற வெளி வேலைகளைச் செய்கின்றன. பெண் குட்டிகள் வீடு கூட்டுதல், பாத்திரம் கழுவுதல் போன்ற வீட்டு வேலைகளைச் செய்கின்றன.
ஊரிலிருந்து சாந்தநாயகம் என்ற பன்றிக்குட்டி, இவர்கள் வீட்டுக்கு வருகின்றது. அது மரத்தில் ஏறிப் பழம் பறிக்கிறது; வீடும் கூட்டுகிறது. இப்படி ஆண் வேலை, பெண் வேலை என்ற பாகுபாடு இல்லாமல், எல்லா வேலைகளையும் செய்கிறது. அது ஆணா? பெண்ணா? என்ற சந்தேகம், மற்ற பன்றிக்குட்டிகளுக்கு வருகின்றது. எல்லாம் சேர்ந்து குளிக்கும் போது, உண்மையைக் கண்டுபிடிக்கின்றன.
பெண் குழந்தை என்றால் இப்படித் தான் இருக்க வேண்டும்; இந்த உடை போட வேண்டும்; ஆண் ஆம்பளை சிங்கம்; அழக்கூடாது; பெண் தான் வீடு கூட்ட வேண்டும்’ என்றெல்லாம் சமூகத்தில் நிலவும் பாலினப் பாகுபாடுகளைக் குழந்தைகளிடம் சொல்லிப் புரிய வைத்துப் பாலினச் சமத்துவத்தை வலியுறுத்தும் கதை இது.
சாந்தநாயகம் ஆணா, பெண்ணா என்று தெரிந்து கொள்ள ஆசையா? இந்தப் புத்தகம் வாங்கி வாசியுங்கள். ஓவியர் A.ஜீவானந்தம் சிறப்பாக ஓவியம் வரைந்திருக்கிறார். வழ வழ தாளில், மிகச் சிறப்பான வடிவமைப்பு. 9+ சிறுவர்க்கானது.
| வகை | சிறுவர் கதை (மொழிபெயர்ப்பு) |
| ஆசிரியர் – கதை உரிமை தமிழாக்கம்:- | Camera-etc, தன்னார்வ நிறுவனம், பெல்ஜியம். நர்மதா தேவி |
| வெளியீடு:- | இடையன் இடைச்சி நூலகம், ஈரோடு. (98412 08152) |
| விலை:- | ரூ 50/- |